( 非醫學長文)

對於我呢個從小在石硤尾長大的九龍人嚟講， 未讀大學之前， 對於香港島的地理同埋地方認識甚少。

以往由細到大直致中小學基本上都係喺石硤尾地區一帶。 以往中學年代 出街的蒲點， 一般都只會去到旺角尖沙咀。 那些年代唱k最鍾意約同學去“旺地恆”， 又或者“尖地恆”度等。 就算聖誕節嗰啲佳節最多都係去到尖沙咀海旁。 甚少過海會到香港島。 彷彿維多利亞港就係我出門嘅一道屏障。 不過我諗呢個現象喺唔少由細到大都係九龍人身上都差唔多。

至於平日的人吃喝玩樂基本上都在西九龍一帶。 最鍾意係去深水埗嘅黃金高登電腦商場。 一來已往事砌電腦機的年代， 二來不少打機嘅老翻碟又或者睇戲vcd dvd, 都可以喺嗰度搵得到。( 至於某一類型獨特的vcd, 老實講從來未買過)。 其實直至今時今日 深水埗黃金一带仍然係我愛 好去嘅地方。 因為嗰度先係香港真正嘅數碼港。 另外平日一至五經常去嘅地方不外乎就係 大坑東，大坑西， 南山村( 唔知點解而家變咗名勝)。 南山邨二樓平台以往有時同啲教會朋友夜晚去吹水就係坐喺中間嘅遊樂場望住周圍一排排的公屋。 估唔到近呢幾年呢個地方變咗打卡勝地。 有時啲嘢真係估你唔到。 另外南山邨平台其實大排檔以往好多好嘢食。 而家很出名的那一間茶餐廳其實我就覺得質素都係麻麻地，味精油重。 就快會畀我打入中伏餐廳系列之一。 大坑西邨就經常會穿過。 一路覺得大坑西邨好古怪又唔似附近啲公屋一樣好似自成一個一個村莊咁。 不過從來都覺得嗰個地方靜英英有啲古怪。 近月睇新聞先知道 ，原來就快拆卸好似都搞到滿城風雨。

anyway .. 越講越遠. 總之未讀大學之前活動範圍基本上限於太子旺角 ，佐敦尖沙咀 ，又或者西至深水埗長沙灣一帶。 港島區甚少接觸。 唔係話冇去過， 細個嗰陣時一定有去海洋公園，動植物公園， 淺水灣 ，或者中環山頂纜車等等 名勝。 但係那時的我基本上走在香港島 ，一定會迷路。 而且心目中係唔知道每個地方 究竟是如何connect， 只知道 去親講到只能夠在地鐵站附近範圍活動， 如果唔係一定係走失。

大學入咗HKU. 那個時候先真正認識香港島的各種地理和地方。 入大學之前中六參加咗HKU 的summer camp。 喺嗰啲 場合我發覺好多人都會互相問大家讀什麼中學， 住喺邊一度。 唔使講都知大部分都係香港島人。 讀嗰啲st 乜st物 嘅中學。 仲好記得有唔少嗰啲中六女仔， 講完自己係st 乜 又或者是某些名牌中學的， 不自覺嘴角會流露出一種自信。 而且嗰陣時好奇怪唔知點解啲人明明係唔同中學但係好似本身已經係相識的。。。。 不過其實港島區嗰啲st中學或者乜colleges， 其實我而家仲有時都會搞錯。

記得有一次有個人問我讀什麼中學， 我話我係讀石硤尾的MY College. 佢聽完我講之後靜咗幾秒諗一諗， 跟住講，“ 石硤尾。。。um。。。 我知啦。。。 係咪即係太子同埋九龍塘 站中間的一個站” 睇得出佢努力 從記憶裝中抽出地鐵站地圖。 Bingo. 嗰陣時覺得原來我長大嘅地方只能夠用其他地方嘅reference去定下來。 不過諗下有幾公平原來九龍人係唔知道香港島嘅東西， 反過來香港島人都唔係好熟九龍。 所以嗰陣時淨係心諗， "打和啦super"

自從讀大學開始甚至之後在醫院和大學工作， 基本上都冇離開過西環或者香港大學附近嘅地方。 以往 中上環西環和中西半山，喺我的腦袋中並沒有連接在一起。 每個地方都非常之fragmented. 即係話你叫我喺九龍去香港大學或者瑪麗醫院我識得去。 又或者由 旺角去中環或者 金鐘灣仔銅鑼灣一帶 ，我亦識得去。 但假若你叫我 喺香港大學去灣仔就真係考起我。 嗰陣時仲未有地鐵咁方便。 另外起初讀香港大學的時候， 成日都唔明點解西環好似好大咁。 有時 就去石塘咀一大食嘢 ，有時又會去堅尼地城可可過一邊。 總之都係過咗幾年先慢慢知道原來西環係點樣都有分區， 亦都知道而家由西營盤到堅尼地城一帶係如何連接起來。 當然慢慢都知道西環原來真係好多好嘢食。

以往覺得 香港大學係一個好奇怪嘅地方， 一嚟地鐵站永遠搵唔到， 另 唔知點解喺個山度。 要返大學最好嘅方法就係搭嗰架焗到嘔電兼多人到 面貼面嘅970, 更快嘅方法就係喺旺角搭金雞紅van仔。 不過有時多人喺上嚟其實van仔排隊都好恐怖。 另一個方法就可以先搭地鐵去到金鐘或者中環， 再轉小巴或者巴士上香港大學薄扶林道。 例如以往都鍾意搭8號或者28號小巴。 但無論搭乜嘢車 起初成日都有暈車浪兼落車上嘔嘅感覺。 因為港島區嘅路窄彎又多而且經常上山落山， 例如喺般咸道轉嚟轉去都已經令我想嘔。 有時想急斜好似西邊街 123街嗰啲，真係轉到頭暈都未上到薄扶林道。 總之以往返學沒有地鐵其實都 幾頭痛和浪費時間。 但係就因為成日坐喺架車度，慢慢會對 西區一帶嘅地方越來越熟悉。

最好笑嘅係有一位 中學同學 佢畀我遲一年入香港大學。 佢入學冇耐，竟然問我金鐘究竟係喺 九龍嗰邊定係香港嗰邊。 而家聽落去好似好荒謬 。但係對於九龍人嚟講以往金鐘從來都只不過轉車站， 唔知實際嘅位置喺邊度。

後來慢慢搭多咗電車先知道整個 西環上環中環，如何連接到灣仔銅鑼灣同埋東邊。

另外成個香港島根本其實好細， 但係地方有好多有時又會覺得佢好大。 讀醫學院好多時要走勻港九地區去唔同嘅診所去上堂。 有時可能要去灣仔近皇后大道東嘅肺癆診所度學習。有時又會 畀瑪麗醫近遠嘅香港仔鴨脷洲門診嗰度上堂。 次次去到鴨脷洲都覺得嗰度真係好遠， 而且從來都唔知點解佢嗰度上堂要拍片。 那是黃竹坑還未有地鐵站， 但有些時候又要走到去嗰一邊。 對我嚟講香港仔黃竹坑一帶呀係畀瑪麗醫院更加西面( 事實上係南不過嗰陣時唔知道)。 明明向反方向 條路咁行， 黃竹坑行到尾又可以過條隧道 。突然間好似時光隧道咁一穿過就返咗銅鑼灣，係香港嘅東面。 第一次過嗰條隧道返咗銅鑼灣簡直覺得係魔術一樣。( 其實而家有時仲有呢種感覺)

跟住因為工作關係 搬咗去堅尼地城， 後來在搬咗去香港到其他地方。 因為地鐵開通嘅關係西環有著重大的轉變。 西環變咗好似中上環一樣華洋雜處， 一間點心舖隔離有一間酒吧cafe嘅奇景。 嗰種新舊交集 又國際化感覺，係令我越嚟越鍾意香港島中西區嘅原因。 另外 以往有一些海外的朋友次次嚟香港 ，我都會帶佢哋周圍去中上環西環一帶又或者半山一帶。 令我發掘到港島區真係一個非常奇異嘅地方 。無論文化氣息或者美食，甚至行山嘅郊區都真係應有盡有。( 另外以往係香港大學有一樣咁奇怪嘅係 原來大學行半個鐘左右可以去到山頂， 第一次行劑感覺又穿越一條時光隧道)

現在無論居住或工作都主要留在港島區， 跟以往讀書時候嘅生活真係很不同。

但話雖如此而家每次搞唔夠返去石硤尾又或者去深水埗嘅電腦商場， 仍然有一種強烈嘅親切感。 例如深水埗電腦商場附近嘅麥當勞仍然喺度， 但係電腦商場入面已經由砌機變成賣手提電腦電話或者電話設備。 唯一冇變嘅 就係永遠嘅人山人海， 無論食物和電話卡都有尋寶嘅感覺。

每次出返石硤尾地鐵站， 整個石硤尾地區變化很大。 以往粉紅色的七層大廈都基本上已經完全清拆。 而家新嘅石硤尾邨 實在比美 將軍澳的大型屋苑。 舖頭當然由以往的小店慢慢變成 連鎖店。 附近的白田邨也進行大規模的起樓翻新。 相信整個區又會變得越嚟越熱鬧。

可幸的是南山村大坑東一帶仍然沒有太大的改變。 嗰間未到唔使我多講嘅彩龍大酒樓依然屹立不倒。( 唔知點解間嘢夜晚會變咗拉丁舞嘅夜總會。。。。) 大力水手快餐店 仍然喺度，不過好似已經轉咗手。

细時聽老一輩嘅人講， 原來叫石硤尾大坑東一大叫做“九龍仔”。 以往都唔知點解。 近來我上網再查返香港歷史, 原來九龍塘九龍城以外的一帶真係以往叫做九龍仔。 唔知邊個係起個咁嘅名，不過同香港仔一樣有異曲同工之妙。

原來我真係出生自九龍仔的九龍仔。

#週末隨想